திருப்பதி பயணக் குறிப்புகள் – 4

திருப்பதி என்றால் லட்டு & மொட்டை தான். துவக்கத்தில் லட்டை கைகளால் உருட்டிச் செய்து கொடுத்தார்கள் ஆனால், நாளடைவில் தேவையானது கட்டுக்கடங்காமல் சென்றதால், இயந்திரம் மூலம் செய்கிறார்கள்.

எனவே, சுவை நன்றாக இருந்தாலும், அதனுடைய அளவு குறைந்து விட்டது, வடிவமைப்பும் இளகி விட்டது. எனவே, விரைவில் உடைந்து விடுகிறது. Image Credit – https://newswen.in/

லட்டை கொடுக்க மட்டும் 60 க்கும் மேற்பட்ட கவுன்டர்கள் உள்ளன ஆனால், அனைத்தும் நிரம்பி வழிகின்றன. இவ்வளவுக்கும் நாங்கள் சென்ற நாள் கூட்டமில்லை.

முக்கியமான நாளில் சென்றால், லட்டு வாங்கி வெளியே வரும் போது அது பூந்தியாகத் தான் இருக்கும் 🙂 . நெரிசலில் நம்மைப் பிதுக்கி எடுத்து விடுவார்கள்.. யம்மாடி!

சாதாரண நாளில் ஒரு நாளைக்குக் குறைந்தது 50,000 – 1,00,000 பேர் வருகிறார்கள். அனைவரும் குறைந்தது இரண்டு லட்டு வாங்குவார்கள்.

ஒரு நாளைக்குத் தோராயமாகக் குறைந்த பட்சம் 2,00,000 என்றால் அதற்குத் தேவைப்படும் மூலப்பொருள், செய்யத் தேவைப்படும் பணியாளர்கள், இவையல்லாமல் மற்ற உணவுப் பொருட்கள் என்று கணக்கு போட்டால் கிறுகிறுக்கிறது.

பணியாளர்கள் எண்ணிக்கை

இவ்வளவு பேரை எப்படிச் சமாளிக்கிறார்கள்? எப்படிப் பணியாளர்கள் அனைவரையும் வழி நடத்துகிறார்கள்? என்று கணக்கு போட்டால், மலைப்பாக உள்ளது. இதைப் பற்றி எழுதினாலே பல கட்டுரைகள் எழுதும் அளவுக்குத் தகவல்கள் உள்ளது.

ஒரு மாதம் பணியாளர்களுக்கு மட்டுமேயான ஊதியமே பல கோடிகளில் இருக்கும்!

திருப்பதியில் பெருமாளைப் பார்க்கத்தான் கூட்ட நெரிசல் என்றால், உண்டியலில் காணிக்கை செலுத்தவும் அடிதடியாக உள்ளது 🙂 .

அனைத்து இடங்களிலும் குடி தண்ணீர் உள்ளது, கழிவறைகள் உள்ளது. இவை முக்கியத்தேவை என்பதை உணர்ந்து அனைத்து இடங்களிலும் செயல்படுத்தி இருக்கிறார்கள்.

கோவிலின் உள்ளே வரிசையில் செல்லும் போது, அங்குள்ள ஒலிப்பெருக்கிகளில் ஒருவர் ‘கோவிந்தா‘ கோஷம் சொல்கிறார். அதைத் தொடர்ந்து பக்தர்களும் சொல்கிறார்கள். தமிழ் உட்பட பல மொழிகளில் கூறுகிறார், இவ்வாறு அறிவிப்பு செய்பவரின் குரல் நன்றாக இருந்தது.

தமிழில் ‘சத்தம் போட்டுச் சொல்லுங்க.. சந்தோசமா சொல்லுங்க..‘ கோவிந்தா கோவிந்தா என்கிறார் 🙂 . தமிழ்நாட்டில் இருந்து வருபவர்களின் எண்ணிக்கை அதிகம் என்பதால், தமிழ் அறிவிப்புகள் அனைத்துப் பகுதிகளிலும் எழுதப்பட்டுள்ளது.

அன்னதானம்

அன்னதானம் தொடர்ந்து அனைவருக்கும் வழங்கிக் கொண்டு இருக்கிறார்கள். இலட்சக்கணக்கான பேருக்கு வழங்கினாலும் தரம் மோசமில்லை என்று கூறினார்கள். நான் சாப்பிட்டு பார்க்க விரும்பினேன் ஆனால், நேரம் ஒத்துழைக்கவில்லை.

₹300 கட்டண நுழைவாயிலில் பால், காஃபி, டீ கொடுக்கிறார்கள் என்று குறிப்பிட்டு இருந்தேன். இதில் பால் சுவை நன்றாக இருந்தது. கொடுக்கப்படும் காகித கோப்பை சில ஓட்டையாக உள்ளதால், பால் சிந்துகிறது ஆனாலும், அதையும் துடைத்துக்கொண்டே தான் உள்ளார்கள்.

சென்னையில் இருந்து திருப்பதி 150 கிமீ தூரத்தில் தான் உள்ளது ஆனால், மோசமான சாலை காரணமாகத் தூரமாகச் செல்வது போல உணர்வு.

மொழி வாரியாகப் பிரித்த போது திருப்பதி தமிழ்நாட்டுடன் இணைய இருந்ததாகக் கேள்விப்பட்டதுண்டு. நல்லவேளை திருப்பதி தப்பித்தது.

விமர்சனங்கள் இருந்தாலும், சிறப்பாகப் பராமரிக்கும் திருப்பதி தேவஸ்தானத்துக்கு பாராட்டுகள். சேவைகளை மேலும் சிறப்பாகக் கொடுக்க வாழ்த்துகள்.

திருப்பதி செல்ல ₹300 கட்டணத்தில் செல்ல விரும்புவர்கள் https://www.tirumala.org/ தளத்தில் முன்பதிவு செய்து கொள்ளலாம். தங்குவதற்கும் முன்பதிவு செய்யலாம், கட்டணம் மிகக்குறைவு. கூட்டம் அதிகம் என்பதால், ஓரிரு மாதங்கள் முன்பே முன்பதிவு செய்ய வேண்டும்.

இரு பாகங்களாகத்தான் எழுத நினைத்தேன் ஆனால், தற்போது பெரிய கட்டுரைகளைப் படிக்கப் பலரும் விரும்புவதில்லை என்பதால், படிக்க எளிதாக இருக்க பயண அனுபவங்களை நான்கு பாகங்களாகப் பிரித்துக் கொண்டேன்.

நான்கு பகுதிகளையும் முழுதாகப் படித்தவர்களுக்கு நன்றி 🙂 .

தொடர்புடைய கட்டுரைகள்

திருப்பதி பயணக் குறிப்புகள் – 1

திருப்பதி பயணக் குறிப்புகள் – 2

திருப்பதி பயணக் குறிப்புகள் – 3

🛑 To get Blog Article, Finance, UPI, OTT, Tech News, Offers follow -–> giriblog WhatsApp Channel (WhatsApp Blog ⭐).