கடவுள் நம்பிக்கை உண்மையா? பொய்யா?

கடவுள் நம்பிக்கை எப்போதுமே விமர்சனத்துக்குள்ளாகியே வருகிறது. அதைப் பற்றிப் பார்ப்போம். Image Credit

கடவுள் நம்பிக்கை

பலருக்கும் கடவுள் நம்பிக்கை பற்றி மாற்றுக்கருத்துகள் இருந்தாலும் கடவுளை நம்புபவர்கள் எண்ணிக்கையே அதிகமாக உள்ளது.

நம்பிக்கை என்று வரும் போது மூட நம்பிக்கைகளும் சேர்ந்தே வருவதால், விமர்சனங்களுக்கும் குறைவில்லை.

இதற்கான விளக்கத்தைக் கண்ணதாசன் அவர்கள் அர்த்தமுள்ள இந்து மதம் நூலில் கூறியுள்ளார்.

சூழ்நிலை

ஒருவரின் கடவுள் நம்பிக்கை மற்றும் நம்பிக்கையின்மையைத் தீர்மானிப்பது ஒவ்வொருவரின் தனிப்பட்ட சூழ்நிலைகள், சம்பவங்கள் தான்.

சிலர் சிறு வயதிலிருந்தே கடவுளை நம்புபவராக வளர்ந்து வரலாம், சிலர் அவர்களது பெற்றோர்கள் அல்லது சுற்றுப்புறச் சூழ்நிலைகளால் நம்பிக்கையில்லாது வளரலாம்.

பெரும்பாலும் கடவுள் நம்பிக்கையுடன் வளர்ந்து பின்னர் அவர்களுக்கு கிடைக்கும் அனுபவங்கள், சம்பவங்களால் அவர்களது புரிதலில் மாற்றம் ஏற்படும்.

எதனால் மாற்றம்?

கடவுள் நம்பிக்கை இல்லாதவருக்கு ஏற்படும் சமாளிக்க முடியாத பிரச்சனைக்கு, மற்றவர்களால் உதவ முடியாத சூழ்நிலையில் கடவுளே ஒரே கதியாகலாம்.

‘நான்கு பக்கம் கஷ்டம் வந்தால், நாத்திகனும் ஆத்திகன் ஆகி விடுவான்‘ என்று கூறுவார்கள்.

அதே போல மிகப்பெரிய அளவில் கடவுள் நம்பிக்கையுடன் இருப்பவருக்கு ஏதாவது மோசமான சம்பவம் நடக்கும் போது கடவுள் மீது வெறுப்பாகலாம்.

யாரையும் ஏமாற்றவில்லை, துரோகம் செய்யவில்லை, கெடுதல் நினைக்கவில்லை ஆனாலும் எனக்கேன் கஷ்டம்? கடவுள் ஏன் உதவவில்லை?!

என்பது தான் ஒரு சராசரி நபரின் எண்ணமாக இருக்கும்.

சிலர் அப்போது கோபப்பட்டாலும், பின்னர் கடந்து சென்று விடுவார்கள். சிலருக்கு அவை பெரிய மனக்காயத்தை ஏற்படுத்தி இருக்கலாம்.

எனவே, இவ்வளவு காலம் கடவுளை நம்பியும், வணங்கியும் என்னை ஏமாற்றி விட்டாரே? உதவவில்லையே! என்று கடவுள் நம்பிக்கையை இழக்கலாம்.

வயது / காலம்

இன்னொன்று வயது காரணம்.

கடவுளை நம்பாதவர்கள், வெறுத்தவர்கள், விமர்சித்தவர்கள் 50 வயதைக் கடக்கும் போது கிடைக்கும் அனுபவங்கள், இளம் ரத்தம் குறைந்தது கடவுளின் பால் ஈர்க்கும்.

இது போன்று ஏராளமானோர் உள்ளனர்.

இன்னொன்று இளம் வயதில் பொறுப்புகள், கவலைகள் இருக்காது. இக்கால கட்டத்தில் எப்படியும் பேசலாம், விமர்சிக்கலாம்.

ஆனால், வயது அதிகரித்து, திருமணமாகிப் பொறுப்புகள் கூடி, எதிர்காலப் பயம் அதிகமாகும் போது தானாகவே கடவுளின் மீது நம்பிக்கை வரும், பக்தி அதிகமாகும்.

சில விஷயங்களை மற்றவர்களிடம் பகிர முடியாத சூழ்நிலையில் யாரிடமாவது குறைகளைக் கூற வேண்டுமே என்று கடவுளைச் சரணடைவார்கள்.

கோவிலுக்குச் சென்று வந்தால் நிம்மதி என்பதெல்லாம் இதில் சேர்வது தான்.

உண்மையா பொய்யா?

முன்னரே கூறியபடி இது ஒவ்வொருவரின் தனிப்பட்ட சூழ்நிலையைப் பொறுத்தது.

சிறு வயதிலிருந்தே கடவுள் நம்பிக்கையுள்ளது ஆனால், கடவுள் உண்மையிலேயே இருக்கிறார் அல்லது நமக்கு மீறிய எதோ ஒரு சக்தி இருக்கிறது, கண்காணிக்கிறது என்பதை சம்பவங்களால் உணர்ந்தேன்.

அதைக்கடவுளாகவே கருதுகிறேன்.

கூடவே இருந்து வழிகாட்டுவதாகவும், கஷ்டம் ஏற்படும் போது பாதுகாப்பதாகவும் உணர்கிறேன்.

சொதப்பும் போது யோசித்துப்பார்த்தால் கடவுள் அதைத் தவிர்க்க வாய்ப்புக்கொடுத்தும் பயன்படுத்தத் தவறியது நினைவுக்கு வருகிறது.

உணர்ந்தவர்கள் எச்சரிக்கையாகிறார்கள். நேரத்தைத் தவற விட்டவர்கள், ஏற்படும் இழப்பால் கடவுளை விமர்சிக்கிறார்கள்.

சிலவற்றுக்குப் பதிலே கொடுக்க முடியாது. அதற்குப் பதில் கிடைக்க வேண்டும் என்றால், ஆன்மீகத்தில் கரைகண்டாலே முடியும்.

சுருக்கமாக, கடவுள் நம்பிக்கை உண்மையா பொய்யா? என்றால், 100% உண்மை என்று என் அனுபவத்தில் உறுதியாகக் கூறுகிறேன்.

தொடர்புடைய கட்டுரைகள்

நம்பினால் நம்புங்கள்

கடவுளை நம்பினால் மருத்துவம் எதற்கு?

🛑 To get Blog Article, Finance, UPI, OTT, Tech News follow -–> giriblog WhatsApp Channel (WhatsApp Blog ⭐).